أسرار الميلاد .. عادل عبد الرازق

 

أسرار الميلاد

*************

بقلمي / عادل عبد الرازق

-----------------------

في نوفمبر59

 البحر واعدني يصاحبني

في نوفمبر 93

البحر قبلني وغرّقني

من 59 ل 93

وانا وانت يا عمري أسرار

...

البحر البحر البحر

تسألني عن شط البحر

راح أقولك كان لي ميلاد

والحرف الأول عالسطر

طيّرت العصافير من صدري

غيمت الغيمة على الأشجار

...

في نوفمبر 59

كانت صرخة بتنزف مع دمي

بتكب الأهة المكتومة

في الضلع الأول من صدري

إتفتحت شبابيك الحيّ

على ليلة شتا حاضنة الشارع

أخر يوم أخر الشهر

وفي أخر العام كان لي ميلاد

حتى خروجي لوش الدنيا

كان م الأول أخر الأشياء

من صغري بابدأ م الأخر

من لحظة مولدي

وانا تايه متغرب محتار

...

في نوفمبر 59

لما حلمت القمر

القمر اتشقق

لا اتأخرت في طريقي

ولا قادر إن انا أسبق

وكأني صاعد للقمة

لكن وانا صاعد بانهار

...

في نوفمبر 93

أنا اسمي انتهى حرفين

رغم اني بدأت حروف أربعة

إنكمش الاسم ف حرفين

عارف إني حاموت

قبل البحر ما يرسم شطين

...

في نوفمبر 2020

أنا عمري عدّا الستين

المطرة كانت أول مشهد

والضلمة كانت أخر مشهد

وميلادي وحياتي

أسرار تولد أسرار

***

عادل عبد الرازق