جنون الحب .. بقلم الشاعر: أحمد صبري

 

جنون الحب

احمد صبري

-

نص كلامك كدب

والباقي متحرف

لما تقول باْحب

بتبقى بتخرف

الحب مش ضحكة

مرسومة ع الفاضي

ولا دمعة منسية

حزينة على ماضي

الحب مش بيذل

ولا يحني ويطاطي

الحب مش بيعر

الحب بيشرف

-

الحب دا إحساس

مش اْي حد يحسه

حبيب يعشق حبيبه

يفضله على نفسه

واللي يخطف ويجري

جبان ما بيحسش

وإللي يخون ويغدر

اْصلا ما بيحبش

وإللي الجفا صابه

معذور ما بيحنش

عايز يشوف الحب

لو مرة من نفسه

-

الحب يعني الجمال

متزين بالسعادة

بيكسر اْي خوف

وبيحرق البلادة

الحب دا موهبة

وفن وهواية

مش هندسة وحساب

ووسيلة للغاية

مجنون اْه مجنون

وجنونه ده حكاية

فيها الطيابة طبع

والحنية عادة

-

جنون الحب لما

حد يحس بيه

يعرف إنه عايش

وروحه لسه فيه

وإللي قافل قلبه

فاكر كده حماية

العمر منه يعدي

العمر له نهاية

وانا عايز اْحب

مين هيحب معايا

الحب دا ف دمي

بس باْدور عليه