من الماضي
هونيك عاسرير الكرم أغفى ونام
مخدة من حجر وفراش من نمنام
عامرجحة بنبضات خدرني النهر
سهيت وخطفني الجن بالأحلام
حولي بعض بقرات عمترعى
والديب عمايجول بالمرعى
عمينتقي ويختار بالقرعة
لكن شخيري لجم شرو لجام
لعب النسيم وهز أغصان الشجر
وشو مستوي عاالأرض كوم هالثمر
عملو وليمة تسابقو فيها البقر
وقديش فرحو بأكل بعد صيام
ومحسوبكن غارق بحبو والغزل
عامل أمير الحب والراعي اعتزل
ماهمه لو نمر عالمرعى نزل
مخمور مابيعرف حلال من الحرام
رغم الفقر شو كان هالماضي حلو
وياريت لو شي يوم لو نرجع ألو
لو طبل دق بعرس بي مشتى الحلو
رح يرقصو بحمص وحلب والشام
كان القمر قنديل مابينوس
والعين كل شفاف عطشى تبوس
ومقايضة بخيرات دون فلوس
والحلم عرس الفرح لما نام
رغيف الخبز فيه انسحر تنور
وكتاف فيه تعرضت وصدور
فيه العفا وقمح الوطن مشهور
قديش فينا قست هالأيام
شاعر العرب نادر منجه
7 4 2023
ليست هناك تعليقات:
إرسال تعليق