قالولي
أوعى الخازوق
بها الدنيا العجيبة
قلتلن
كلا خوازيق
من خي ومن قريبي
ومن اصحابي
الكانوا قراب
ومن جيران البعيدة
ومن واحد طعميتو
دهر
ومن واحد عالجته
شهر
ومن واحد موتني
قهر
بعد ما كسر إيدي
وخازوق
مجمع تجميع
عند الشروة والمبيع
والغلا مطبع تطبيع
بها البلد العجيبة
الفقير ما الو ضهر
وأيامو كليتا قهر
وبيشرب من مية نهر
بابريقو المشرومة
باع البيت وشجراتو
وبالخيمة حط مراتو
وضاعو منو وليداتو
وعم يدور كسرة خبز
ولما انتقد الحكومة
بشخصياتا المتظومة
الدورية ساقيتو سوق
وبعدا فلقة نعومة
يا معتر يأبن بلادي
ليش ضيعت السعادة
كنت تمختر دادي
صرت بحصر ضيقة حال
وقالوا
أوعى من الخازوق
وتهدى وشي روق
والغابة ليك شعلانة
وبلادي مليانة حروق
كنا نسبح حد الشط
وولاد تنط وما تحط
ونطلع عالغابة سيران
ونرقص نحنا والجيران
نشوي فروج ولحمات
الله يرحم يلي مات
صرنا ندور عالخبزات
بالبطاقة العجيبة
كان الراتب ماشي الحال
ونعيش برفق ودلال
صرنا نسأل بإزلال
لقمة وخبزة رهيبة
صار السارق عنا بيك
بتيفلسف بيكلماتو
ومنعرف أنو كذاب
ومن صفقلو بحياتو
ومنرقص لجياتو
تيوزع مسروقاتو
ونقلو أهلا بالبيك
قالو بدن حرية
خربو بلادي الهنية
وقصتنا هيدي هييه
شو بتقولو يا أخوان
#####
د. موفق محي الدين غزال
اللاذقية سوريا
ليست هناك تعليقات:
إرسال تعليق